Հայաստանի պետական պարտատոմսերի շուկայի ծավալը դեկտեմբերին աճել է 328%-ով

Հայաստանի ֆոնդային բորսան (AMX) 2025 թվականի դեկտեմբերին արձանագրել է կապիտալի շուկայի ակտիվության կտրուկ աճ․ այն դարձել է տարվա ամենահագեցած ամիսը թե՛ առևտրի ծավալներով, թե՛ գործարքների քանակով։

Աճի հիմնական շարժիչ ուժը պետական պարտատոմսերի շուկան էր։ Տեղաբաշխման հարթակում տեղաբաշխվել է ավելի քան 32,5 միլիարդ դրամի պարտատոմս, իսկ երկրորդային շուկայում գործարքների ծավալը հասել է շուրջ 29 միլիարդ դրամի։ Տարեկան կտրվածքով շրջանառությունն աճել է 328%-ով, ինչը վկայում է պարտքային գործիքների նկատմամբ ներդրողների հետաքրքրության կտրուկ մեծացման մասին։

Բարձր ակտիվություն է պահպանվել նաև կորպորատիվ պարտատոմսերի շուկայում. ամսվա ընթացքում կնքվել է 1504 գործարք՝ շուրջ 13,3 միլիարդ դրամ ընդհանուր ծավալով, ընդ որում շրջանառության մեջ է եղել 167 թողարկում։

Բաժնետոմսերի շուկայի առևտրի ծավալը գերազանցել է 6 միլիարդ դրամը, իսկ շուկայական կապիտալիզացիան հասել է շուրջ 467 միլիարդ դրամի՝ տարեկան կտրվածքով աճելով 6,29%-ով։ Ընդհանուր առմամբ կնքվել է բաժնետոմսերով 190 գործարք։

Զգալի ծավալներ են գրանցվել նաև ՌԵՊՈ շուկայում. ընդհանուր շրջանառությունը գերազանցել է 4 միլիարդ դրամը, իսկ զամբյուղային ՌԵՊՈ հարթակում իրականացվել է 5 գործարք՝ շուրջ 5 միլիարդ դրամի չափով։

Բորսայի արտարժույթի շուկայում դեկտեմբերին իրականացվել է ԱՄՆ դոլարով 4 գործարք՝ շուրջ 877 միլիոն դրամի չափով։ Գործարքների միջին գինը կազմել է 381,35 դրամ մեկ դոլարի դիմաց։

Դեկտեմբերյան ցուցանիշները հաստատում են ներդրողների վստահության աճը և Հայաստանի ֆինանսական համակարգում կապիտալի շուկայի դերի հզորացումը։

Աղբյուրը՝ ArmInfo