Մինչև 1 մլն ՀՀ դրամ անձնական մուտքերը չեն ենթակա լինելու հայտարարագրման

ՀՀ կառավարության որոշման համաձայն՝ ընտանիքի անդամ չհանդիսացող անձից ստացված մինչև 1 մլն ՀՀ դրամ միանվագ դրամական մուտքերը չեն ենթակա հայտարարագրման։

Չհայտարարագրվող մուտքերի ցանկում ներառվել են նաև․

1. Ստացված վարկերը՝ առանց գումարի սահմանափակման։
2. Հայաստանի հավաքականի մարզիկների և մարզիչների միջազգային մրցումներում հաղթելու համար ստացած մրցանակները, ինչպես նաև պետական պարգևները։
3. Գործատուի կողմից վճարվող բժշկական ապահովագրության ապահովագրավճարները, ներառյալ ֆիզիկական անձի կամ նրա հետ փոխկապակցված անձանց օգտին կատարվող վճարումները։
4. Մրցույթներում ստացված դրամական և գույքային մրցանակները՝ յուրաքանչյուր մրցանակի համար մինչև 50 000 ՀՀ դրամ։
5. Ընտանիքի անդամ չհանդիսացող անձանցից ժառանգությամբ կամ նվիրատվությամբ ստացված գույքը և դրամական միջոցները՝ մինչև և ներառյալ 1 մլն ՀՀ դրամ։
6. Ոչ առևտրային կազմակերպություններից անհատույց ստացված ակտիվները, աշխատանքները և ծառայությունները՝ մինչև 1 մլն ՀՀ դրամ։
7. Ֆիզիկական անձին պատկանող գույքի օտարումից ստացված եկամուտները, որոնք ստացվել են ընտանիքի անդամ չհանդիսացող անձանցից, բացառությամբ Հարկային օրենսգրքով նախատեսված հողատարածքների վաճառքի որոշ դեպքերի։

Որոշումը միտված է նվազեցնելու վարչարարական բեռը և պարզեցնելու հայտարարագրման կանոնները՝ քաղաքացիների կողմից փոքր չափի եկամուտներ ստանալու դեպքում։